عايز أموت

أنا عايز أموت

بس أموت من غير ألم

عايز أسيب حالة الوجود

وأهرب إلى حالة العدم

عايز أبقى محض ذكرى

مش جسد مليان زخم

عايز أبقى كلمة حلوة

ع الشفايف والقلم

مصمصوا عليا الشفايف

قولوا تفكيره انعدم

قولوا عني عقلي راح

واحشدوا ليا الأمم

يخلصوا ليا النصيحة

يهدوهالي في كرم

بس أنا هارجع واقولها

"نفسي أموت" بلا ندم

إحدى قصائدي القديمة

بتاريخ 17 أبريل 2009

نفسي ابوح

نفسي ابوح باللي في قلبي بس خايف
آجي ابوح تنطبق مني الشفايف
انسى الكلام ما اقدرش اقوله وارتبك
وارجع ألوم القلب واعتب ع الشفايف
***
أحلام منامي عايزة تهرب من المنام
يوصفها لون مش طيف باشوفه لما أنام
بس خايف من الحياة لتقوللي لأ
يصبح حرام الحلم حتى في المنام

لو في أمل قولولي

إن كان في أمل... قولولي
وروني هو فين... شاورولي

عايشين زي الحمير
نتساق زي البعير
الوضع اصبح خطير
بل اكتر من خطير
فين الامل؟ قولولي

حريق ورا حريق
وغريق وياه غريق
والبيه القاتل بريء
تايه بينا الطريق
بالذمة في أمل؟
إن كان موجود قولولي

مش عارف ابكي وانادي
وانوح على بلادي
ولا امشي جنب حيط
واقعد اربي في ولادي؟
رجاء
لو في امل قولولي

ذكريات

ذكرى السنين متبسمة

فاتحة الجروح المؤلمة

بافتكر أيام زمان

وابكي دمع على اللي كان

واللي كانوا والمكان

بافتكر أيام طفولة

ضحكة صافية ولعب كورة

راحة البال والبراءة

هما سكان كل صورة

فجأة تيجي الإعدادية

دنيتي كبرت شوية

قلبي دقدق ع البيبان

حبي كان بنت الجيران

كانت الأيام سعيدة

بيها باحلم من زمان

بس لما

شرفت ثانوية عامة

والحياة زيطة ولمة

والمرارة في قلبي عامة

فجأة ما لقيتش الصديق

إيدنا فكت ع الطريق

كل واحد راح في ناحية

والعيون من يومها صاحية

تفتكر أيام زمان

تبكي دمع على اللي كان

ع اللي كانوا والمكان

فتحت عيوني

فتحت عيوني
صورتك قدامي
غمضت عيوني
شفتك بمنامي

محتار بين صحو ونوم
وبافكر طول اليوم
اشوفك جوة الصورة
ولا تجيلي في أحلامي

كلمة مختلفة

من قلب كلمة
تطلع كلمة مختلفة
حالتها مقلوبة
وبالعكس معترفة

خناق طويل
ومستحيل
إلى السلام يلقوا سبيل

ياللعجب
حالهم كدة والأصل واحد
كيف كانوا صاروا يا ترى "لو كان الأصل مختلفا"؟

قال الريس

قصيدة سياسية وربنا يستر

قال الريس

آل الريس

هما الحكما

وهما الزعما

أصله بيحكم شعب كويس

أعمى وسايب أمره لأعمى

شعب متيس

شعب مهيس

سارح تايه جوة الزحمة

ولا بيفكر ولا بيقرر

بس بيسأل ربه الرحمة

مش لاقي يشرب مش لاقي يهرب

مش لاقي ياكل عيش ولا لحمة

شعب بيمشي جوة الحيط

وبيحمد ربه على النعمة

نعمة إنه ما شافش الحرب

ويقول دي من الريس حكمة

ويقولك ريس غلبان

والوزرا بتوعه حرامية

ضحكوا عليه وعلينا كمان

ضحكوا عليه وعليك وعليا

ويقولك ريس شبعان

لو جه غيره راح يسرقنا

يسرق ينهب بالأطنان

ويحول في سويسرا عرقنا

لو وزراؤه ضحكوا عليه

يبقى مغفل لازم يمشي

وإن كان غيره راح يسرقنا

طب ما هو جاي اليوم وهيمشي

يمشي يقابل رب كريم

واحنا هنبقى في علم عليم

نرجع تاني نقول الرحمة

ويضيع منا العيش واللحمة

علشان تهنا في وسط الزحمة

وآمنا إن الريس نعمة

ثمار وبذور

في اليوم ميلاد

ومعاه بعاد

تطرح الدنيا قلوب

وتموت قلوب

صرخة ودموع لحظة لقاء

ونواح حزين ساعة فراق

دنيا براح

ساعة ومكان تسكنه الأفراح

نفس المكان نفس الزمان

ضيق حزين مليان نواح

والدنيا ماشية.... ماشية تدور

مهما ننام مهما نثور

تسرق ثمار

تهدي بذور